Գլխավոր էջ | Տեսակետ-Ասուլիս | Կոնսենսուս մինուս ԲՀԿ. կքանդեն բոլորը

Կոնսենսուս մինուս ԲՀԿ. կքանդեն բոլորը

By
Կոնսենսուս մինուս ԲՀԿ. կքանդեն բոլորը

Բարգավաճ Հայաստան կուսակցության ներկայացուցիչները բավականին սուր են արձագանքել պատգամավոր Սերգեյ Բագրատյանի հայտարարությանը, որով նա հայտնում էր հանրությանը պատճառը, թե ինչու է դուրս եկել ԲՀԿ խմբակցությունից: Սերգեյ Բագրատյանի վերաբերյալ մամուլը գրել է, որ մի շարք բիզնեսներ ունեցող պատգամավորը խնդիրներ ունի պետության հանդեպ պարտավորությունների առումով, ինչն էլ բերել է քաղաքական պահանջների եւ խմբակցությունը լքելու: ԲՀԿ խոսնակ Իվետա Տոնոյանի արձագանքը եւս այդ տրամաբանության շրջանակում էր: Սերգեյ Բագրատյանն ինքը հայտարարել է, որ խմբակցությունից հեռանում է, որովհետեւ վերջին շրջանում կայուն անհամաձայնություն կա երկրի զարգացման ընթացքի վերաբերյալ մոտեցումների հարցում:

Ո՞րն է ԲՀԿ խմբակցությունը թողնելու իրական պատճառը, հնարավոր չէ ասել ճշգրիտ, բայց այստեղ քաղաքական առումով հետաքրքիրը թերեւս բավականին սուր արձագանքն է, որ առկա է ԲՀԿ-ում: Այդ արձագանքի սրությունը վկայում է, որ կուսակցությունը Սերգեյ Բագրատյանի հեռանալը չի դիտարկում մեկ դեպքի տրամաբանության շրջանակում, այլապես հազիվ թե հզոր երկրորդ ուժի համար էական լիներ մեկ պատգամավորի կամ մանդատի կորուստը:

ԲՀԿ-ն, ըստ երեւույթին, ունի մտավախություն, որ կարող է գործ ունենալ շղթայի հետ: Ամենից էականն այն է, որ Գագիկ Ծառուկյանի տանն ԱԱԾ խուզարկության արդյունքում հայտնի երդմնագրերի հրապարակայնացումը փաստացի կտրել է ԲՀԿ կապող առանցքային մի թել, մեծ հաշվով ազատելով բոլոր նրանց, ովքեր կապված էին այդ թղթերով:

Իսկ ամբողջ հարցն այն է, որ դրանք լոկ Գագիկ Ծառուկյանի այսպես ասած քմահաճույք չէ, որ եղել են: ԲՀԿ-ն, որ ձեւավորվել է նախորդ իշխող համակարգում եւ եղել դրա առանցքային, երկրորդ բեւեռը, մեծ հաշվով եղել է այսպես ասած ներհամակարգային փակ բաժնետիրական կուսակցություն, որում հսկիչ փաթեթը գուցե եղել է սեփականատիրոջը՝ Գագիկ Ծառուկյանինը, բայց տարբեր խումբ կուսակցականների տեսքով բաժնեմասեր են ունեցել համակարգի տարբեր առանցքային թեւեր եւ առաջնորդներ:

Երդմնագրերով Գագիկ Ծառուկյանը իրեն փորձել է հնարավորինս ապահովագրել  հենց այդ «բաժնեմասերի» միջոցով իրեն մատուցելիք անակնկալներից: Առավել եւս, որ հարց է, թե ինքը՝ Ծառուկյանը, ինչ պարտավորագրերով կարող էր հարաբերված լինել համակարգի առաջնորդների հետ, որում ստանձնել է առանցքային կուսակցապետերից մեկի դերը:

ԱԱԾ խուզարկությունը քանդել է կապը, կարեւոր, թերեւս առանցքային կապը, հաշվի առնելով այն, որ հարաբերությունը նախկին համակարգում կառուցվել է առավելապես հենց այդ արժեքաբանական սկզբունքների հիմքով:

Առավել եւս, որ կապի քանդվելը ներկայումս ձեռնտու է թերեւս ներքաղաքական կյանքում ներգրավված բոլոր խաղացողներին, սկսած թե քաղաքական մեծամասնությունից, եւ թե ընդհուպ նախկին համակարգը ներկայացնող առանցքային ուժեր, եւ անգամ Ծառուկյանի հետ գործակցության գնացողներ: Նրանք գնում են Ծառուկյանին առավել մոտ լինելու, ըստ այդմ՝ ազատ մնալիք տեղին առավել շուտ հասնելու համար:

Ռոբերտ Քոչարյանը վերջին հարցազրույցում անդրադարձավ իր իսկ բարձրաձայնած «կոնսենսուս մինուս մեկ» բանաձեւին, որում առերեւույթ մինուս մեկը Նիկոլ Փաշինյանն է: Խորքային առումով սակայն, ներկայումս քաղաքական դաշտում ձեւավորված «կոնսենսուս մինուս մեկ»-ի իրական «մինուսը» Գագիկ Ծառուկյանի ԲՀԿ-ն է, որն այդպես էլ չգտավ նոր իրավիճակի իմաստավորման, եւ այդ իրավիճակում սեփական դերի իմաստավորման ճշգրիտ բանաձեւը: Այդ տեսանկյունից նա սկսել է խանգարել բոլորին, ինչի վկայություն էր թերեւս նաեւ այն, որ գրեթե ոչ ոք Ծառուկյանին չշտապեց աջակցել «հակառուսականության դեմ պայքարի» նրա հռչակագրի հարցում: ԲՀԿ ապամոնտաժմանն այդ իմաստով ուժերի ներածին չափով կմասնակցեն բոլորը, ոչ միայն քաղաքական մեծամասնությունը: Եվ գուցե մեծամասնությունն ամենից քիչ:

ՀԱԿՈԲ ԲԱԴԱԼՅԱՆ, Մեկնաբան

 

 

 

 

  • Ուղղարկել ընկերոջ Ուղղարկել ընկերոջ
  • Տպագրելու տարբերակ Տպագրելու տարբերակ
  • Տեքստային տարբերակ Տեքստային տարբերակ

Պիտակներ:

Պիտակներ չկան

Գնահատական

0